Sóltún öldrunarþjónusta ehf tekur við rekstri á hjúkrunarheimilinu Sólvangi á árinu 2019 í kjölfar útboðs Ríkiskaupa
,,Við hjá Sóltúni öldrunarþjónustu ehf erum full tilhlökkunar að taka við rekstri Sólvangs í Hafnarfirði á næsta ári þegar nýja húsnæðið sem er í byggingu verður tekið í gagnið”, segir Halla Thoroddsen framkvæmdastjóri Sóltúns öldrunarþjónustu ehf.
Rekstur Sólvangs var boðinn út í sumar 2018 af hálfu Ríkiskaupa fyrir hönd Sjúkratrygginga Íslands og niðurstaða útboðsins var sú að Sóltún öldrunarþjónusta ehf varð fyrir valinu. Greiðslur verða samkvæmt rammasamningi um hjúkrunar- og dvalarrými við Sjúkratryggingar Íslands.
,,Við teljum hér vera spennandi tækifæri á Sólvangi og hlökkum til að bjóða upp á hjúkrunarþjónustu sem byggir á hugmyndafræði sem hefur gefið mjög góða raun á hjúkrunarheimilinu Sóltúni í Reykjavík, en það hefur verið rekið við góðan orðstír til margra ára. Hugmyndafræði Sóltúns hefur umhyggju fyrir einstaklingnum í fyrirrúmi, þar sem sjálfræði hans er virt í allri umönnun. Heimilisandi og virðing fyrir einkalífi hvers íbúa er ráðandi um leið og öryggiskennd sem hlýst af sambýli og sólarhringshjúkrunarþjónustu er náð. Athafnir daglegs lífs eru viðfangsefnið með áherslu á þátttöku íbúa og aðstandenda þeirra eftir getu, óskum og vilja hvers og eins,” segir Halla.
,,Unnið verður með hugmyndafræði Sóltúns en það verður munur á milli þjónustustigs Sólvangs og Sóltúns hjúkrunarheimilis. Sóltún er rekið samkvæmt sérstökum þjónustusamningi en Sólvangur eftir rammasamningi um hjúkrunar- og dvalarrými við hið opinbera. Hins vegar munu íbúar Sólvangs hafa aðgang að fjölbreyttri þjónustu sem léttir daglegt líf“.
Halla Thoroddsen verður framkvæmdastjóri Sólvangs og Ingibjörg Eyþórsdóttir framkvæmdastjóri hjúkrunar.
Sóltún öldrunarþjónusta ehf mun einnig leggja áherslu á gott starfsumhverfi á Sólvangi fyrir starfsfólk og að heimilið verði eftirsóknarverður vinnustaður. Sóltún öldrunarþjónusta ehf er hluti af Sóltúnsfjölskyldunni sem rekur Sóltún hjúkrunarheimilið, Sóltún öryggis- og þjónustuíbúðir fyrir 60 ára og eldri og Sólstöður starfsmannaleigu.
Sóltún Heima hefur frá árinu 2017 boðið upp á persónulega heimaþjónustu, heimahjúkrun og heilsueflingu fyrir eldri borgara á höfuðborgarsvæðinu sem miðar að því að efla, styrkja og styðja aldraða í sjálfstæðri búsetu. Félagið getur boðið upp á samfellu í þjónustu við aldraða frá því að veikindi gera vart við sig og létt undir með fjölskyldum á heimili þeirra á meðan beðið er eftir hjúkrunarrými.
Nánari upplýsingar í síma 563 1400 eða á solvangur@soltunheima.is.
