Sólvangur hjúkrunarheimili

Sóltún Heima tekur við rekstri á hjúkrunarheimilinu Sólvangi á árinu 2019 í kjölfar útboðs Ríkiskaupa

,,Við hjá Sóltúni Heima erum full tilhlökkunar að taka við rekstri Sólvangs í Hafnarfirði á næsta ári þegar nýja húsnæðið sem er í byggingu verður tekið í gagnið”, segir Halla Thoroddsen framkvæmdastjóri Sóltúns Heima.

Rekstur Sólvangs var boðinn út í sumar af hálfu Ríkiskaupa fyrir hönd Sjúkratrygginga Íslands og niðurstaða útboðsins var sú að Sóltún heimahjúkrun og heimaþjónusta ehf varð fyrir  valinu. Greiðslur verða samkvæmt  rammasamningi um hjúkr­un­ar- og dvalarrými við Sjúkratryggingar Íslands.

,,Við teljum hér vera spennandi tækifæri á Sólvangi og hlökkum til að bjóða upp á hjúkrunarþjónustu sem byggir á hugmyndafræði sem hefur gefið mjög góða raun  á hjúkrunarheimilinu Sóltúni í Reykjavík, en það hefur verið rekið við góðan orðstír til margra ára.   Hugmyndafræði Sóltúns hefur umhyggju fyrir einstaklingnum í fyrirrúmi, þar sem sjálfræði hans er virt í allri umönnun. Heimilisandi og virðing fyrir einkalífi hvers íbúa er ráðandi um leið og öryggiskennd sem hlýst af sambýli og sólarhringshjúkrunar- þjónustu er náð. Athafnir daglegs lífs eru viðfangsefnið með áherslu á þátttöku íbúa og aðstandenda þeirra eftir getu, óskum og vilja hvers og eins,” segir Halla.

Sóltún Heima mun einnig leggja áherslu á gott starfsumhverfi á Sólvangi fyrir starfsfólk og að heimilið verði eftirsóknarverður vinnustaður.  Sóltún Heima er hluti af Sóltúnsfjölskyldunni sem rekur Sóltún hjúkrunarheimilið, Sóltún öryggis- og þjónustuíbúðir fyrir 60 ára og eldri og Sólstöður starfsmannaleigu.  Sóltún Heima hefur hingað til boðið upp á persónulega heimaþjónustu, heimahjúkrun og heilsueflingu eldri borgara á höfuðborgarsvæðinu sem miðar að því að efla, styrkja og styðja aldraða í sjálfstæðri búsetu.  Með Sólvangi getur félagið boðið upp á samfellu í þjónustu við aldraða og létt undir með fjölskyldum á heimili aldraðra meðan beðið er eftir hjúkrunarrými.

Nánari upplýsingar í síma 563 1400 eða á soltunheima@soltunheima.is.